بيان تغيير

انا جرة قلم محطوط على الدفتر
تؤكدانى جيت اليوم
برغم انى ولا بحضر
ولا واحد بيمضيلى خروج وياه
وبالتالى
فانا لسانى ممشتش
يجوز من شهر او اكتر
انا جرة قلم موجود مع المحضر
لامر استدعا ميقولش على سببه
لكنه حلف لى على شنبه
بانى راح ابات فى البيت
ويمشى وعقلى بيفتش عن الاسباب
يدور فى التاريخ كله
انا جرة قلم كانت
بتمضى قسيمه للترشيح امين لجنه على
الجامعة
ورفضونى فى لاظوغلى
بدون اسباب
واصبح اسمى مش موجود على الكشف
اللى متعلق
وكل الجامعة بتعلق
اكيد اخوان
اكيد وفدى
دة عيل وسط بلداوى
شيوعى يسارى مش معروف
انا جرة قلم موجود فى وصل النور
تؤكد ان انا بدفع
دة فى الوقت اللى شارعنا
مخاصم كابل كهربته
ساعات يقطع
ساعات اكتر عشان ييجى
انا جرة قلم خلصان وبيقطع
على فيشى
وطلب السلفه ممشيشى
وحتى تظلم التامين بتاع والدى
فى درج المكتب الايديال
وفوقه وتحته كام جرة قلم مدفون
انا جرة قلم مطبوعه فى الجرنان
فى باب اسمه السكوت ممنوع
رساله بتشتكى للمسؤول على حالة
رغيف العيش
يدوب نزلت فى كام كلمه
وشالوا مصطلح شكوى
وحطوا نداء
ساعتها عرفت
بانه مذله لو تشتكى لغير الله
وحتى لما حطوا نداء
فى مين ف الدنيا سمعوا نداه
انا جرة قلم مضوها بالاكراه
يسيب الشغل ويوافق
على تعديل مواد موجودة فى الدستور
والا هيخصموا منه 3 ايام
انا جرة قلم محطوطه ع القايمه
وغقد جواز منيش فاكر تفاصيله
وكام كان المؤخر فيه
ما هى رفاهيه لو تقدر
تفكر فى الطلاق مرة
وخد لك م الحياه عبرة
وعشها بصبر
انا جرة قلم سالفة
عشان امضى لعيل جى من صلبى
بانه اتولد وخلاص
واصبح فى البلد ديه
يدوب امضا اضافيه
وزود لى هموم قلمى بكام جرة
فاتورة صرخته الاولى على الدنيا
ومدرسته كمان حبه
تعهد ان انا المسؤول اذا كرر مشاغباته
انا جرة قلم عاد اللى فات كله مع
اخواته
وما اتعلمش
انا جرة قلم فوق شيك
لكام حاجة ناقصها البيت وجت
بالتقسيط
وفضلت تدفع الفايدة بقطم الوسط
انا جرة قلم برصاص
ثلاثى فوق بيان تغيير
مكلبش فيه على سطره
ساعتها زميلى كان رافض يسلفنى لقلمه
الجاف
وقال انى اعيش خواف
دة اكرم لى
وتبقى اهبل اذا شايف
فى جرة قلمك التافهة
بطوله كافيه للتغيير
ساعتها ضحكت
وقلت فى سرى بعديها
لا هى موته ولا اكتر
شهادة موتى لما اموت
ومكتب صحة يختمها
محدش راح يمضينى
انا جرة قلم عايشه
وطول ما هى عايشه راح تطلب
تعيش حرة

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.