مين يشتري مصر!!؟

مين يشتري مصر؟
مين يشتري مصر!!؟
مين يشتري مصر!؟
مين يشتري وطني!؟
دي مصر هي الأصل
فيها أهلي وفيها كمان سكني
مصر اللي بقت للبيع والكل بيبيع فيها
حتى الحكومة يا ناس الدنيا ضاقت عليها
باعت كل حاجة
باعت البحر للي يقدر على تمنه
وباعت البنوك كل بنك أقل من تمنه
وباعت الغاز لمين ؟ ويا مين يقوللي على تمنه
وباعت الأرض بحجة الاستثمار
وباعت المصانع اللي ا تبنت بالعرق والدم والنار
وباعت شبابها للبحر يبلعهم
واهاليهم على الشط تبكي وتنوح
وتقول ياريت يابحر ترجعهم
والمسئولين نازلين تصاريح
صحيح مفيش حاجة توجعهم
كل شوية سفينة تروح والبحر يطويها
واسألوا العبارة اللي راحت بكل مافيها
آه استنوا دا كان فيه عبارة قبليها
وصاحب العبارة أخد طيارة وطار بيها
والكل قاعد إيده على خده مستني ربك يسويها
والقضية في المحكمة منظورة بس إمتى يتحكم فيها
والناس بتقول أزاي طفش صاحب العبارة
الناس غلابة مش فاهمين أصل العبارة
أصل العبارة للي تقل فهمه
اللي له ضهر ماينضربش على بطنه
واتحكم فى القضية ببراءة القبطان
وصاحب العبارة برىء هو كمان
والناس اللي غرقت همه الغلطانين ياجدعان
واللي مات مات وراحت حياته بلاش
أصل اللي ماتوا دول شوية من الأوباش
لو كان ليهم تمن كانت الدولة باعتهم
لكن عشان همه حثالة راحت للبحر باعتهم
زي ماباعت زمان شهداءنا في سينا
لما اليهودي اعترف بلسانه علشان يورينا
ازاي قتل اسرانا وهم من السلاح عزل
ونكل بيهم وصورهم علشان بينا العار ينزل
ولما هاجت الأقلام تطالب الحكومة خدي أكشن
اتحركت الحكومة وعلا صوتها وبقى صوتها ياناس أخشن
طالبنا بالتعويض ومحكمة دولية تقيم العدل
معانا وثائق وشهود وكمان اعتراف اليهودي الندل
ولما الموضوع دخل في شد وجذب
اتحرك اليهودي وكلم أسياده هناك في الغرب
وجات الأوامر لينا من الأسياد هناك في الغرب
هدي الامور ونيم الموضوع
ماتفتحش السيرة دي تاني أظن الكلام مسموع
هو فيه حاجة تيجي من الغرب تسر القلب
دا إحنا في الآخر عرب جرب ولاد ستين كلب
وراحت كرامة مصر وراحت الهيبة
وراحت العزة يامصر يامصر جتك خيبة
قاعدة تقولي أنا وأنا وعايشه في الأوهام
بقيتي انت ورا وشعوب ودول تانية مشت كتير قدام

وخش عالصحة وشوف إيه اللي جرى فيها
أكياس دم فاسدة وملوثة ومشكوك فيها
وصاحب المصنع دا مهم خلى الوزارة تشتريها
ولما الامر انكشف قالوا عيب في التصنيع ياعم عديها
واتحكم عليه بالبراءة هو كمان
أكيد اللي حكم عليه مش قاضي
أكيد اللي حكم عليه شيطان
وأكيد الشعب عن الحكم مش راضي
لكن حيعمل إيه الشعب الشعب ده غلبان
وتعالي شوف العلاج في مستشفيات الحكومة
اللي كتير من الخدمات الصحية محرومة
زحمة وعراك و لازم تستنى دورك
ويمكن قبل ما يكشفوا عليك حبيبك عزرائيل يزورك
أما العلاج في القطاع الخاص
فلازم تدفع ياحلو الفلوس أكياس أكياس
وآه لو رمتك الأقدار عندهم
يبقى راحت كل فلوسك اللي حوشتهم
ولو مفيش معاك فلوس تدفعها
روح بيع عفش بيتك أو ارهن مراتك أو بعها
وآه لو فكرت إنك ماتدفعش
يمكن يدخلوك في غيبوبة
وتبقى كبني آدم ماتنفعش

وخش عالتعليم وإقرا عليه الفاتحة
كل شوية يقولوا تطوير
وملامح التطوير مش واضحة
مرة الابتدائي خمس سنوات ومرة ست سنوات
وفي الآخر تلاميذ مش فالحة
وتلاميذ تهرب وماتكملش تعليمها
وتهيم في الشوارع وتصيع والحكومة إيه هاممها
ويظهر تاني توربيني ونشوف الف ضحية
ياعم شاغل نفسك ليه مش هي دى القضية
القضية مش إن التلاميذ تهرب
القضية إن فيه امتحانات بتتسرب
يعني خيبة التعليم في هيئة التدريس
ومين يعالج التعليم من ذلك التسويس
ده كل طالب أو تلميذ محتاج درس خصوصي
ورب الأسرة يفرغ جيوبه ويصرخ آه يا فلوسي

وخش عالزراعة يا سيدي و اترحم عليها
علمونا في الجغرافيا زمان
إن مصر... الزراعة أحلى ما فيها
فيها النيل والوادي وفلاح فصيح
عارف إزاي يزرع أراضيها
وسيدنا يوسف زرعها قمح
وأكل مصر والبلاد اللي حواليها
وبني إسرائيل قالهم موسي
انزلوا مصر واللي عاوزينه حتلاقوه فيها
دلوقتي القمح مش مكفي والمحصول مش موفي
وبنستورد تفريبا معظم الحبوب
والأرض جرفوها وطينتها باعوها
علشان يعملوا منها للمباني طوب
وبقت الأرض مش كافية بتنزرع بالعافية
وبيبنوا عليها عمارات وبيوت
وحط التقاوي واديها كيماوي وكل ياشعب
واللي يعيش يعيش واللي يموت يموت
وكترت الآفات وهات مبيدات حتى لو كانت مسرطنة
ده شعب مايسواش مفيش حد فيهم فايق وكله آخر سلطنة
دا الشعب متخدر بكلام متفصل
عاوز تشوف تعال هنا اتفضل
مليارات راحت بحجة زيادة الأرض
وحنزود الإنتاج ويزيد دخل الفرد
والله الشعب صبور وعمره مابيشكي
وفلوسه بتروح فين وسلم لي على توشكي

وخش على الفن والفنانة والفنان
اللي في كل مكان بياخدوا بعض بالاحضان
وتشوف الفنانة تبوس وتحضن الفنان

اه يا مصر

Share on Google Plus

About Unknown

This is a short description in the author block about the author. You edit it by entering text in the "Biographical Info" field in the user admin panel.