في دايرة الرحلة ... تروق بينا تحلي ... في دايرة الرحلة ... طرق بينا تخلي.هي ده طبيعة الحياة!!!
أيام نحس أننا هنلمس النجوم من كتر السعادة ... وأيام تانية بنحس أننا كل الأبواب مقفلة في وشنا ... بس مابنفتكرش أغنية محمد منير (في دايرة الرحلة) إلا لما طرق بينا تخلي ... يعني لما تضيق علينا وكل الطرق تتسد في وشنا.هي الدنيا كده أكثر كلمة بنسمعها في المواقف ده ... بس الدنيا مابتعملش حاجه لحد الدنيا ده مخلوق فاني لا حول ولا قوة لها ... طيب هنرجع نقول إيه السبب!!! الأسباب بتختلف من واحد للتاني بس كلها في الاول والاخر من عند ربنا ... يعني إيه!! تأكد دايماً إن ربنا رايدلك الخير ... ولما تكون في أصعب محنة إعرف إن ده إمتحان من عند ربنا مش تضعف وتقول هي الدنيا كده ... لأ أرجع لربنا وأعمل اللي هو عايزه وبس "وَمَا خَلَقْتُ الْجِنَّ وَالْإِنسَ إِلَّا لِيَعْبُدُونِِ" سورة الذاريات الأية رقم 56 انت أصلاً ربنا خالقك عشان تعبده يعني كل الي انت عايش فيه ده المفروض تسخره لخدمة العبادة وتستخدمه الاستخدام الصحيح ... مش تقولي أصل انا عايز أجرب ولا تقولي انا بعمل كذا عشان كذا (لا تزر وازرة وزره أخري) "مَّنِ اهْتَدَى فَإِنَّمَا يَهْتَدي لِنَفْسِهِ وَمَن ضَلَّ فَإِنَّمَا يَضِلُّ عَلَيْهَا وَلاَ تَزِرُ وَازِرَةٌ وِزْرَ أُخْرَى وَمَا كُنَّا مُعَذِّبِينَ حَتَّى نَبْعَثَ رَسُولاًِ" سورة الإسراء الأية رقم 15 ... يعني ماجيش أقولك صلي تقولي ياعم ده انا لسه سايب البت هو انا ربنا هيتقبل مني صلاه ... ده انت كده تبقي وقعت في اكبر غلط!!! إنك ثقتك بربنا قلت جداً ... وكمان ماصلتش عشان كنت ماشي مع البت؟؟؟ يعني عملت بدل الغلط اتنين!! راجع نفسك قبل ماتقول كلام انت مش قده. ممكن يسكنك النار سبعين خريفاً ... كما قال صلي الله عليه وسلم "إن العبد ليتكلم بالكلمة من رضوان الله تعالى ما يلقي لها بالاً يرفعه الله بها درجات , وإن العبد ليتكلم بالكلمة من سخط الله تعالى ما يلقي لها بالاً يهوي بها في جهنم » رواه البخاري يبقي هنا لازم تخلي بالك من كلامك حتي وانت في عز أزماتك ... ومهما كان مين صاحب الازمه ده لازم تكون بتحب ربك أكتر منه وهنا الفرق بيظهر ... معظم أزمات الشباب هي الحب أو مايسموه بالحب الواد يمشي مع البنت يومين البنت يجيلها عريس الواد يقعد يشد في شعره لغاية ما يقرع يا عيني ... ويقولك انا مش هعرف أعيش من غيرها!!! ليه يابني (أوعي تقولي انا مش بني) انت عايش عشانها ولا عايش عشان ربك ... ال مش هقدر اعيش من غيرها ال ... طيب انا همشي معاك للاخر وهقولك انت حبتها وحبيتها جامد كمان ... بس هل يستحق أي إنسان مهما كان هو مين نحبه أكثر من ربنا!!! لا ده انت كده تبقي مش عايش عشان تعبده والدنيا خدت بزينتها الفانية (المنتهيه لعشاق العامية ) يابني فوق وأرجع لربك مالكش غيره في الدنيا والاخره ... "يَوْمَ لَا يَنفَعُ مَالٌ وَلَا بَنُونَِ * إِلَّا مَنْ أَتَى اللَّهَ بِقَلْبٍ سَلِيمٍِ" سورة الشعراء الايتين 88 و 89 . معلش أنا عارف إنك زهقت مني ... أصل انا عارف نفسي ممل ... طيب يا سيدي تعالي أكلمك علماني ونشوف كلمة "هي الدنيا كده ده صح ولا غلط" ... انا هكلمك في نفس المضمون من غير ما أحطلك الدين في النص ... بص لمشاكلك كلها اللي انت فيها دلوقتي ... وتعالي نرغي مع بعض حبتين هسألك أول سؤال في مشكلتك ده ... الغلط غلط مين غلطك انت ؟ إنت اللي حطيت نفسك في المشكله ده ولا الدنيا هي الللي حطتك؟ ... هتقولي ياعم هو في حد بيحط نفسه في مشاكل هقولك انت هتقولي إزاي ... أقولك أنا يا سيدي إنت مش لما حصلتلك المشكله ده قلت ياريتني كنت عملت كذا (كذا ده عيني الصح) ... يعني انت إقتنعت دلوقتي انك عملت الغلط!! مع ان في ناس كتير قعدت تنصح فيك لكن انت عاملي فيها بطل وعايز تجرب ... جربت يا فالح!! إتصدمت مش كده ... طيب فكرت في كل مشاكلك وعرفت إن انت السبب فيها!! هتقولي طيب إفرض ده مكانش بإيدي زي مثلا انا عملت كل حاجه عشانها وفي الاخر لقيتها خاينه أو طلعت كدابه أو باعتني ... هقولك برضه عيبك انت لانك كنت غبي ومافهمتش ده من البداية وهي طلعت بتفهم عنك وقدرت تضحك عليك ... أو كمان هقولك انت اللي خليتها تبقي كده لانك مقدرتش تحتويها ... في النهاية انا كنت بتكلم في الموضوع بالعموم (الموضوع مابيتكلمش بس عن الحب الموضوع بيتكلم عن أي مشكله بتواجه الشباب) صلح من نفسك تلاقي نفسك سعيد علي طول مش محتاج لحد عشان هو اللي يسعدك ... إعمل لاخرتك قبل دنيتك وأتقي الله في عملك وفي بنات الناس وفي أهلك وخلي بالك من نفسك ... حط تحت خلي بالك من نفسك ده 100 خط ... وأعي لاصحابك واخواتك واهلك ربنا يهديهم وماتنساش تدعيلي
Blogger Comment
Facebook Comment